Alǵys eki jaqqa da, ıaǵnı ony aıtqandarǵa da, qabyldaǵandarǵa da jaǵymdy jaıt. Adamnyń kóńili men mereıin ósiretin, ishki jan saraıyn jyly nurǵa toltyratyn sát. 1 naýryz elimizde Alǵys aıtý kúni dep belgilengeni málim. Sonyń qurmetine Aqtóbe aımaǵynda taqyrypqa shyǵaryp otyrǵanymyzdaı «Alǵys aıtý – paryz» atty aptalyq ótkizilýde.
Bul ıgi sharaǵa Qazaqstan Halqy Assambleıasy janyndaǵy «Qoǵamdyq kelisim» KMM bastamashy bolyp otyr. Onyń aıasynda soǵys jáne eńbek ardagerlerine jáne múmkindigi shekteýli jandarǵa moraldik jáne materıaldyq turǵydan ár túrli kómekter kórsetilýde. Atalǵan datanyń kóktemniń alǵashqy kúnine sáıkes kelýi tekten tek emes. Dál osy kúni Memleket basshysynyń Jarlyǵyna sáıkes Qazaqstan Halqy Assambleıasy quryldy. Oıdy oı jalǵaıdy. Taǵdyrdyń tálkegine tap bolyp qasıetti qazaq jerine eriksiz jer aýdarylǵan etnos ókilderi qanshama?! Olardyń qazaq halqyna aıtatyn alǵystary sheksiz ekeni anyq. Sonyń basty bir belgisi men kórinisi ótken jyly táýelsizdik merekesi qarsańynda Aqtóbe qalasynda «Qazaq halqyna myń alǵys» atty kókke boı sozǵan, ushar basynda qalyqtaǵan qyrannyń beınesi bederlengen kelisti keshenniń turǵyzylǵany deýge bolady. Bir sózben aıtqanda bul kún yntymaq pen qaıyrymdylyqtyń jáne meıirimdilik pen tózimdiktiń taptyrmas úlgisin bildire alatyny anyq.
Mine, dál osyndaı maqsatta búgingi kúni ónerkásibi órkendegen óńirde san qyrly is-sharalar keńinen qanat jaıyp otyr. Sondaı-aq aptalyq aıasynda az qamtylǵan jáne kóp balaly otbasylarǵa qaıyrymdylyq kómekter kórsetý isi de qosa atqarylýda, - deıdi Qazaqstan halqy Assambleıasy aqsaqaldar keńesiniń tóraǵasy Erkin Qurmanbek. Al káris ultynyń ókili elimizdegi bilim berý isiniń ardageri Elızaveta Kım gazet tilshisine óz tilegin bylaısha jetkizdi:
«Qazaqstan kóptegen etnos ókilderiniń basyn biriktirip otyrǵan izgi memleket. Etnostyq ereksheligimizge qaramastan biz bárimiz de qazaqstandyqtarmyz. Bizdiń ortaq otanymyz – Qazaqstan. Munda erkin, azat táýelsiz elde Alǵys aıtý kúni belgilenýiniń mańyzy zor, mánisi tereń. Osyndaı merekege tatıtyndaı kún adamdardy bir birine odan saıyn jaqyndastyra túsedi. Ári bir birine degen qurmeti men syılastyq sezimin tereńdete alady. Bizdiń barlyq jetistikterimiz eń aldymen osyndaı yntymaq pen aýyzbirshiliktiń arqasynda dep esepteımin. Sonyń ishinde bir kezderi deportasııaǵa ushyraǵan kezde qazaq jerinen pana tapqan Koreı halqy ókilderiniń qazaq halqyna aıtatyn alǵysy mol», dep aıaqtady óz rızashylyǵyn E.Kım hanym.
Sondaı-aq aımaqta Alǵys aıtý kúnine arnalǵan aptalyq aıasynda memlekettik tildi jáne Qazaqstan etnostary tilderin oqytatyn jeksenbilik mektepterde tegin dárister tyńdaldy.
Temir Qusaıyn
«Egemen Qazaqstan»
Aqtóbe